મેઘધનુષ

ભાદરવા વદ ચૌદસ [શસ્ત્ર કે અકસ્માતથી થયેલા મોતનું શ્રાદ્ધ]

આજનો સુવિચાર:- જે કર્મમાં અકર્મને જુએ છે અને અકર્મોમાં કર્મને જુએ છે તે મનુષ્યો બુદ્ધિમાન છે, યોગી છે અને સર્વ કર્મ કરનારો છે.

હેલ્થ ટીપ્સ:- પાર્કિસનનાં દર્દીઓએ યોગાસન, પ્રાણાયમ, ધ્યાન તેમ જ હસવાના[લાફીંગ] પ્રયોગો પર વધુ ધ્યાન આપવું જોઈએ.

                                       ચાલતા ચાલતા

       
      કહેવાય છે કે મુંબઈ ક્યારે સુઈ નથી જતું સતત ચાલતું જ રહે છે. આ ‘ચાલવા’ શબ્દ પરથી મોર્નિંગ વૉક કરનારા પર થોડું નિરિક્ષણ કરવાનું મન થયું.

       હું અને સુધીર લગભગ રોજ સવારે ગીરગામ ચોપાટી પર મોર્નિંગ વૉક કરવા જતાં હોઈએ છીએ. મફતલાલ બાથથી ફ્લાયઓવર બ્રીજ સુધી રોજ ચાલતાં હોઈએ છીએ. એક વખત એક ભાઈને ચાલતાં જોઈ મને મનમાં થયું કે આ ભાઈ કેટલાં ટેંશનમાં ચાલી રહ્યાં છે. પછી મનમાં વિચાર આવ્યો કે આપણે શા માટે આટલી વહેલી સવારે ઊઠીને ચાલવા આવીએ છીએ. મન શાંત રહે અને વાતાવરણની મહેક મ્હાલવા જઈએ છીએ તો શા માટે મનને આટલું અસ્વસ્થ રાખવું જોઈએ. આ ભાઈને જોઈને વિચાર આવ્યો કે ચાલો રસ્તે ચાલતી વ્યક્તિની ચાલ મ્હાલીયે.

     કોઈ તો એવી રીતે ચાલે કે જાણે પરેડ કરતાં હોય હાથ લાંબા લાંબા કરી ખભા સુધી ઊંચા કરતા ચાલે ત્યારે મને જોહસન બેબી પાઉડરના મોટા ડબ્બા પર લખેલું મરઘીનાં બચ્ચા માટે લખેલી કવિતા યાદ આવી.

     Left Right Left Right
  Always ready for the Fight

     ત્યાંતો એક જાડા બેન ચાલતાં અવતાં જોયા એક તો બોડી ફીટ વોકીંગ સૂટ પહેર્યું હતું અને આખા બોડીનાં બિહામણા આકાર દેખાતાં હતાં અને એવી રીતે ચાલતાં હતાં કે જાણે ગોળમટોળ પીપડું ચાલ્યું આવતું હોય. કોઈક તો જાણે એવી રીતે ચાલતાં હોય છે કે જાણે હમણાં જ પડી જશે પણ ખરેખર એમને દાદ આપવી જોઈએ કારણ પોતાની જાતનું કેટલું બેલૅંસ રાખે શકે છે.

    અરે! અરે! આ ધરતી કેમ ધણ ધણે છે? જોયું તો એક ભાઈ જોર જોરથી પગ પછાડતાં પછડતાં જોગીંગ કરતાં હતા. આમ તો મિલિટરીનાં જવાનો ઘણીવખત દોડતાં હોય છે પણ તેઓ આવી રીતે ધરતી હલાવતા નથી અને બાજુમાંથી ક્યારે પસાર થઈ જાય તેની ખબર પડતી પણ નથી એટલા શાંતીથી પસાર થતાં હોય છે.

     એક કાકા તો ડોલતાં જાય હાથની લાકડી માથા પર ગોળ ગોળ ફેરવતાં જાય અને હરિ ૐ હરિ ૐ બોલતાં જાય પછી સામેવાળી વ્યક્તિને બોલવું હોય કે ન હોય. પછી તો એ કાકાને અભોવાદન ન કરવું હોય તો લોકો નજર ફેરવી ચાલતાં થાય. એક ભાઈને કેટલાંક વર્ષોથી એક જ ઝડપે દોડતાં જોઈ એમ જ લાગે કે આ ભાઈને ક્યારે થાક જ નહીં લાગતો હોય? એ ભાઈને ક્યારેય અમે ચાલતા જોયા જ નથી.

       થોડીક બહેનો સાથે ચાલતી ચાલતી પોતાની વહુ પ્રત્યેની અથવા તો સાસુ પ્રત્યેની બળતરા કાઢતી હોય છે. અને એ ન હોય તો સમાજ પ્રત્યેનો ઊભરો ઠાલતાં ચાલતાં હોય છે. ઘણાં પાળ પર બેસી શેરમાર્કેટની વાતો કરતાં હોય છે તો ઘણા આધ્યાત્મિક વાતો પણ કરતાં હોય છે. એક ખાનગી વાત કહું તો એક ગ્રુપ એવું છે કે હંમેશા રોજ એક સમયે મળતું તો હોય છે પણ દર ગુરુવારે પાળ પર બેસીને ચા નાસ્તો પણ કરતાં હોય છે એટલું જ નહી પણ દર ગુરુવારે ફુલ હાજરી સાથે. અમને તેઓ ઘણી વખત ઑફર પણ કરતાં હોય છે [અમારી જ્ઞાતીનાં જ ભાઈ બહેનો છે એટલે] પણ અમે તો જે શ્રી કૃષ્ણ કહી આગળ વધી જઈએ.

     ઘણાં રસ્તે વેચાતાં કારેલા, તુલસી, લીમડા, આદુ, જવારા, ગાજર વગેરેનો રસ પીતાં હોય છે સાથે સાથે મફતમાં મળતાં ફણગાવેલાં મગ અને ચણા પણ આરોગતાં હોય છે. પહેલાં તો કબૂતરને ચણ આપવાવાળા બેસતાં હતા પણ હવે તો રસ્તામાં તેઓને બેસવાની મનાઈ આવી હોવાથી કબૂતરનાં ચોતરા પર જ જોવા મળે છે.

        ઘણાં ભેગા મળીને પ્રાર્થના પણ કરતાં હોય છે તો ઘણાં પાળી પર બેઠાં બેઠાં યોગ પણ કરતાં હોય છે પછી ભલેને એમની રીત સાચી હોય કે ન હોય કરતે રહો. ઘણાં ભેગા ચાલતા ચાલતાં વાતો કરતાં હોય છે જ્યારે અમે બંને સાથે ચાલતાં પણ અજનબી જેવાં વાત જ નહી કરવાની [તો જ નિરીક્ષણ કરવા મળે ને!] આમ તો ચાલતા ચાલતા ઘણા હરિ ૐ નું અને જય શ્રી કૃષ્ણનું અભિવાદન કરતાં હોય છે પણ અમારી જ્ઞાતિનું કાંઈક જુદુ જ અભિવાદન છે ‘જે જે શ્રી ગોકુલેશ’.

     મને ઘણીવખત એમ વિચાર આવે કે જો આપણે કોઈનું આટલું નિરીક્ષણ કરીએ તો કોઈ આપણું પણ આટલું જ નિરીક્ષણ નહીં કરતું હોય ? અચાનક સુધીરે કહ્યું કે ‘જો સૂરજદાદા દેખાય છે.’ અને અમે બંને

   ૐ સૂર્યાય નમઃ
  ૐ આદિત્યાય નમઃ
  ૐ ભાસ્કરાય નમઃ
  ૐ મિત્રાય નમઃ
  ૐ દિવાકરાય નમઃ

બોલી સૂર્યને અભિવાદન કરતાં પાછા ફરી જઈએ છીએ.

                              ૐ નમઃ શિવાય