ઓળખ

                                    મેઘધનુષ

            ગગનરૂપી કેનવાસ પર પ્રકૃતિના તેજ અને જળ તત્વથી રચાતું કુદરતનું એક અનુપમ સર્જન. ક્ષિતિજ પર બનતી ક્ષણિક ઘટના. જેમ નિર્ગુણ બ્રહ્મ ‘એકોહં બહુસ્યાં’ કરીને એકમાંથી અનેક થઈને સગુણ બની સૃષ્ટિની રચના કરે છે એવી આ કોઈક અદ્વિતિય ઘટના એટલે મેઘધનુષ.  આપણે ત્યાં મેધધનુષ મોટે ભાગે અર્ધવર્તુળાકાર જોવા મળે છે પણ કહેવાય છે કે ગગનરૂપી બ્રહ્માંડમાં બાર વર્ષે પૂર્ણવર્તુળાકાર મેઘધનુષ બને છે, જે હકીકતમાં મેઘધનુષ નથી હોતું પરંતુ તમામ દેવો વર્તુળાકારે ઊભા રહીને સમુહમાં પૂજા કરે છે તેનું પ્રતિબિંબ હોય છે. આવા કેટકેટલાં રહસ્યો મેઘધનુષના સાત રંગ પાછળ છુપાયેલા છે. આવી જ અદ્વિતીય ઘટના માનસરોવરને કિનારે નિહાળવાનું સુખ પ્રાપ્ત થયું હતું.         

મારા માટે મેધધનુષનો અર્થ છે ભક્તિરૂપી જળ અને ઈશ્વરિય પ્રકાશના સંયોજનથી બનેલા જીવનના સાત જુદા જુદા રંગો. જેમાં નીલો રંગ, નીલા કડકિયા નામથી મારી સાથે જોડાયેલો છે. લીલો રંગ મને મારી કૈલાશયાત્રાના એ લીલાછમ્મ પહાડોની યાદ અપાવે છે. મારી કૈલાસ યાત્રાની શરુઆત 1996 થી થઈ હતી ત્યારથી આજ સુધી પાંચ વખત આ યાત્રાનો લ્હાવો ભોલેબાબાની મહેરબાનીથી મળતો રહ્યો છે 

    સૌને એ સત્યમ શિવમ સુંદરમ ની અનુભૂતિનો લ્હાવો મારી જેમ મળે એ માટે કૈલાશયાત્રા-પ્રવાસનું પણ આયોજન કરતી રહું છું. વાચકો તે માટે વધુ માહિતિ મેળવવા નીચે આપેલા મારા ઈ-મેઈલ સરનામે મારો સંપર્ક કરી શકે છે.

   મારા જીવનનો પીળો રંગ એટલે ભક્તિના રંગે રંગાયેલા મારા પતિ, ‘સુધીર કડકિયા’. જીવનના દરેક ક્ષેત્રમાં તેમનો દ્વારા મળતો સહકાર આ મેઘધનુષને ટકાવી રાખવામાં ઉપયોગી બનતો રહ્યો છે. જાંબલી અને રાતા રંગ જેવા અરમાનોથી ભર્યા ભર્યા કેનેડા અને અમેરિકા સ્થિત મારા સંતાનો – કવન અને તપન. વળી મારી વહુઓ બીના અને શીતલ અને તેમનાથી રચાતું એક નવું નાનકડું બાળકોનું મેઘધનુષ – પૂજા, જીષા, ઈશ અને રિચા.

    મારા શબ્દો અને સર્જનાત્મક કાર્યોથી ઈશ્વરની જે ઉપાસના કરવાનો આનંદ અવસર મળે એને હું વાદળી અને નારંગી રંગે ઓળખાવું. જેમ વાદળો અને એની પાછળથી ઉદય થતો સવારનો નારંગી રંગનો સુરજ, જીવનમાં કંઈક નવું કરવાનો સંદેશ લઈને આવે છે તેમ મારા જીવનમાં આ રંગો મને હંમેશા કંઈક નવું કરવાને પ્રેરે છે. આ તમામ રંગોથી રચાયું મારા સંપૂર્ણ પરિવારનું મેઘધનુષ.  

[ આ શબ્દોની સજાવટ મૃગેશે કરી છે.]

     અહીં આ મેઘધનુષ પણ કંઈક એવા જ રંગોની ભાત પાડે છે. પેલું મેઘધનુષ એ આકાશનું સર્જન છે, આ મેઘધનુષ બ્લોગ, એ મારા અવકાશનું સર્જન છે. ક્યારેક કોઈ કાવ્ય, છંદ, ટૂંકી વાર્તા અને ઈશ્વરની વાંગમય ઉપાસનાના જુદા જુદા રંગોથી તેને સજાવવાની કોશિશ કરીશ. જેમણે આ વિચાર આપ્યો એ સોનલબહેન અને જેમણે આકાર આપવામાં મદદ કરી એ મૃગેશ, એમ બંને પ્રતિ આભાર વ્યકત કરું છું અને આપ સૌ વાચકોનો સહકાર ઈચ્છું છું. હું પોતે તો કોઈ લેખિકા કે કવિયત્રી છું નહીં, જે માણું છું એ માણવાનો બીજાને લ્હાવો મળે એવી કોશિશ કરું છું, માટે આપને પણ આપની કોઈ કૃતિ મેઘધનુષના રંગોમાં સમાવવાની ઈચ્છા હોય, તો જરૂરથી મારો સંપર્ક કરો. આશા છે આપને આ સાત રંગોની રંગોળી પસંદ આવશે.

નીલા કડકિઆ
વાલકેશ્વર
મુંબઈ
kadakia_neela@hotmail.com

 

                                    

                                                  ૐ નમઃ શિવાય

 

 નીલા સુધીર

 

 કવન બીના પૂજા

 

પૂજા જીષા 

તપન શીતલ ઇશ રિચા  

 

 

      રિચા                     ઇશ  

કિલ્લોલ કરતું મેઘધનુષ